Plattdeutsch

August un Willem underholt sik over datt bevorstohende Schüttengell

Dag Willem, so endlich isset nu so wiet, datt ik dik datt Programm vor use Schüttengell geben kann. Ik hebbe vor dik extra ein Abzug mehr moken laten, dormit du ganz genau Bescheid weßt.

Näh August dien Programm kannste beholn, weil ik doch nich middeholen daue. Ik woll uk erst, over nu was gistern de Kerl midde Festabzeichen hier un woll mik ein verköpen, over wie ik den Pries e `hört hebbe, is mik de Lusten wer vergohen. 25 Euro vor ein Festabzeichen is doch en beten happig. Un dorom go ik erst gor nich henn. Du sißt doch uk in Festkomitee, segg mol, ging et nich noch en beten dürer?

Minsche Willem, nu hol over den Atem an, de Festschleifen de mütt soveel kosten, dormit wie overhaupt over de Runden komen dauet. Du wesst doch selber dat alles dürer worn ist. Meinste vorre Schützengesellschaft nich? Un Priese tau nehmen, wo man glik wett, dat man Geld tauleggen mott, watt man nich hat, datt gaht doch weis Gott woll uk nich. Du most uppe andern Siete uk seihn, watt du davon hast. Du kannst 3 Dage uppn Telte gohen und stohen wo un wie lange du wutt, blos nich hindere Theke un uppn Podest vor de Musik. Un du kannst an twei Königsfreustücken middemoken, Un bi den Feustücke do gifft et jo nich blos watt tau eten, sondern uk ordentlich watt tau drinken. Wie ik dik kenne Willem biste jo uk gornich bange, wenn et watt vorummesüß gifft, brukste jo uppn Schüttengell uk nich. Bien lessten Schüttengell haste tauepacket, datt du jedesmol hinnerher schietendicke wärst. Un denne de Musik mott uk betolt werden oder glövst du datt de vorumme süss speelt? Nä Willem de krieget alle öhr Geld, un datt hett se sick uk redlich verdeint, oder wördest du een Dag Urlaub opfern un den ganzen Dag vorumme süss in andern Dorpe Musik moken?

So geseihn, August, haste recht, denn is et bestimmt nich tau dühr. Morgen gohe ik henn un hole mik ne Dauerkorte. Dorumme kannste mik datt Programm ruhig geben. Un datt nächste mol do kome ik erst no dik, ehr ik over watt schimpen daue, du wesst immer genau Bescheid un hast uk meistens Recht.

Siehste Willem datt hev ik all immer e ´seggt. Wiedersehn Willem! Wiedersehn August!

 

In Breuckel is wer Schüttengell — Teil 2 –

August und Willem underholt sik do over

Dag, Willem, na sieht man dik uk mol wer! Jo August, de Winter is jo nu woll vorbie, so datt man mol wer no butten kiekn kann, außerdem hat de Doktor seggt, datt mik en betten Bewegung nich schohen dä. – Na, Willem, Bewegung kriegste jo nu balle, denn von 21. bet 24. Juni fiert wie jo wer Schüttengell un do wütt wie doch woll alle drei Doge richtig middeholen un ordentlich danzen un fiern! Du glövst gornich wie ik mik dorop freue! Ik un miene Marie übet all jeden Obend no Radiomusik, domit wie de hillen Dänze wie “Twist” un “Rockn-Roll” uk dorchholt.-

August! Ik glöve dik gat et nich gut, du hast et woll in Koppe kregen! Up diene ohlen Doge wutt du noch Schüttengell middeholen un uk noch Danzen? Ik will over nich mehr, ik bin all veel tau old.-

Willem, du körst hüte genauso wie vor drei Johren, do haste uk e seggt, datt du nich mehr middemoken wost. Un watt was noher? Du wörst oberhauptnich no Hus tau kriegen! Am leibersten härste uppn Telte schlopen, um jo den Schluß midde taukriegen un morgens glieks wer do biehe tau wesen.-

Wenn man over uk datt erstemol Musik hört un den Speelmannszug un dat Schützenregiment mit sienen Holtgewehren an Friedag obend bien Werbemarsch durcht Dorf trecken süht, denne wartet ein ganz kribbelig inne Feute un man tüt Sünnobend middag los. Ik glöve datt gaht mik dütt Johr wer genauso. Watt haste seggt, wann gat et los?

An Friedag, den 21. Juni, Willem. Use Schüttengell ward dütt Johr uk wer genauso wie freuer no ohle Tradition e holen, un do et all wer drei johre here is, datt wie datt leste Schüttengell e fiert hät, ward uk sicherlich wer genausoveel los.